- વડાપ્રધાન નરેન્દ્ર મોદીએ ભારતની વિદેશ નીતિને નાગરિકકેન્દ્રી, વિકાસકેન્દ્રી અને સુરક્ષાકેન્દ્રી બનાવી છે
- ભારતે સંકટના સમયે પાડોશી દેશોને મદદ કરીને પાડોશી ધર્મને સાર્થક કર્યો છે
- પ્રેક્ષક નહીં, પણ ખેલાડી બની સક્રિય રાજનીતિ થકી દેશસેવા કરવાની પ્રેરણા મને શ્રી નરેન્દ્ર મોદીએ આપી
: કેન્દ્રીય વિદેશમંત્રી ડો. એસ.જયશંકર
———
સુરત ખાતે ‘મોદી@૨૦’ પુસ્તક અને ‘ગ્રોઈંગ ઈન્ડિયા, ગ્લોરીફાયિંગ વર્લ્ડ: મોદી યુગમાં વિદેશ નીતિ’ વિષય પર પ્રેરક વિચારો રજૂ કરતા કેન્દ્રીય વિદેશમંત્રી
સુરત:સોમવાર: કેન્દ્રીય વિદેશમંત્રી શ્રી ડો.એસ. જયશંકરે સુરત ખાતે વીર નર્મદ દક્ષિણ ગુજરાત યુનિવર્સિટીના કન્વેન્શન હોલમાં આયોજિત મોદી@૨૦’ પુસ્તક અને ‘ગ્રોઈંગ ઈન્ડિયા, ગ્લોરીફાયિંગ વર્લ્ડ: મોદી યુગમાં વિદેશ નીતિ‘ વિષય પર પ્રેરક વિચારો રજૂ કરતા જણાવ્યું કે, ‘વડાપ્રધાનશ્રી નરેન્દ્ર મોદીના રૂપમાં દેશને વિરાટ વ્યક્તિત્વ મળ્યું છે. વિશ્વના માનસપટલમાં ભારત તરફ જોવાની નજર મોદીજીના પ્રયાસોથી ધરમૂળથી બદલાઈ છે. ભારતે મુશ્કેલીના સમયે અફઘાનિસ્તાન જેવા દેશોની પણ વ્હારે આવ્યું હતું. ભારતે સંકટના સમયે પાડોશી દેશોને મદદ કરીને પાડોશી ધર્મને સાર્થક કર્યો છે.’
કેન્દ્રીય વિદેશમંત્રી શ્રી ડો.એસ. જયશંકરે સ્વામિ વિવેકાનંદ ગુજરાત રાજ્ય યુવા બોર્ડ દ્વારા આયોજિત ‘વૈશ્વિક પરિપ્રેક્ષ્યમાં ભારતની ભૂમિકા‘ વિષય પર યુવાનો સાથે સંવાદ કરતા MODI@20 પુસ્તકમાં નરેન્દ્ર મોદીની ૨૦ વર્ષની યાત્રાને શબ્દદેહ આપવાનો યથાર્થ પ્રયાસ કરાયો છે, જે અન્ય માટે પ્રેરણાદાયી સાબિત થશે એવો સ્પષ્ટ મત વ્યક્ત કર્યો હતો.
મંત્રીશ્રીએ વધુમાં જણાવ્યું કે, આ પુસ્તકમાં વિવિધ ક્ષેત્રના ૨૧ જેટલા મહાનુભાવો દ્વારા લેખ લખવામાં આવ્યા છે. જેમણે ‘રાઈટ વિઝન, રાઈટ એક્શન‘થી રાષ્ટ્રનો તેજ વિકાસ થઈ શકે છે એનું તાદ્રશ્ય શબ્દ ચિત્રણ કર્યું છે. દરેક વ્યક્તિએ ખાસ કરીને ભારતના યુવા વર્ગે આ પુસ્તક અવશ્ય વાંચવું જોઈએ.
શ્રી નરેન્દ્ર મોદીની સામાન્ય કાર્યકર્તા અને મુખ્યમંત્રીથી લઈને વડાપ્રધાન સુધીની યાત્રાને બિરદાવતાં તેમણે જણાવ્યું હતુ કે, છેલ્લા ૨૦ વર્ષમાં નરેન્દ્રભાઈ મોદીની કુનેહ અને દીર્ઘદ્રષ્ટિના પરિણામે આજે ભારતની ખ્યાતિ વિશ્વફલક પર અંકિત થઈ છે. આ સંદર્ભે શ્રી જયશંકરે ઉદાહરણ આપતા કહ્યું કે, જ્યારે ભારતમાં કોરોના સામે બે બિલિયન વેક્સીનેશન, ૮૦ કરોડ લોકોને ગરીબ કલ્યાણ અન્ન યોજના હેઠળ રાશન આપૂર્તિ અંગે હું વિદેશમાં વાત કરૂ છું ત્યારે વિદેશીઓ આશ્ચર્ય પામે છે.
તેમણે યૂક્રેન- રશિયાના યુદ્ધ દરમિયાન ભારતીયોને યૂક્રેનમાંથી સહી સલામત પરત લાવવાની વડાપ્રધાનશ્રી મોદીની મુત્સદીગીરીનો ઉલ્લેખ કરતાં ઉમેર્યું હતુ કે, રશિયા-યુક્રેન યુદ્ધ શરૂ થયું એ સમયે યુક્રેનમાં વીસ હજાર વિદ્યાર્થીઓ ફસાયા હતા. કેન્દ્ર સરકારના પાંચ મંત્રીઓને યુક્રેન અને આસપાસના દેશોમાં મોકલવામાં આવ્યા હતા. વડાપ્રધાનશ્રીએ રશિયાના પ્રેસિડેન્ટ વ્લાદિમીર પુટિન અને યુક્રેનના ઝેલેન્સ્કી સાથે ફોન પર વાત કરી ખાતરી મેળવી કે જ્યારે ભારતીય વિદ્યાર્થીઓને રેસ્ક્યુ કરાઈ રહ્યા હોય ત્યારે ફાયરિંગ અને હવાઈ હુમલા નહીં થાય. મોદીજીના આ ડાયરેકટ કોમ્યુનિકેશનના કારણે બન્ને દેશો સંમત થયા અને વંદે ભારત મિશન હેઠળ ૯૦ ફ્લાઈટમાં જાનહાનિ વિના તમામ વિદ્યાર્થીઓને ભારત લાવવામાં સફળતા મેળવી. વિદેશમાં ફસાયેલા નાગરિકોને ‘મદદ‘ પોર્ટલથી ઉગારવાના કારણે વિદેશ જતા દરેક ભારતીય હવે કોઈ પણ વિકટ સંજોગોમાં સુરક્ષાની લાગણી અનુભવે છે.
પ્રેક્ષક નહીં, પણ ખેલાડી બની સક્રિય રાજનીતિ થકી દેશસેવા કરવાની પ્રેરણા મને શ્રી નરેન્દ્ર મોદીએ આપી હતી એમ જણાવી શ્રી જયશંકરે ગર્વપૂર્વક જણાવ્યું કે, વડાપ્રધાન નરેન્દ્ર મોદીએ ભારતની વિદેશ નીતિને નાગરિકકેન્દ્રી, વિકાસકેન્દ્રી અને સુરક્ષાકેન્દ્રી બનાવી છે. યમન અને યુક્રેન ક્રાઈસીસ દરમિયાન તબક્કાવાર કુલ ૭૦ લાખ ભારતીયોને પરત લાવવામાં આવ્યા હતા. અનેક મુસીબતો, સંકટો, કુદરતી- માનવસર્જીત આફતોની સામે પણ નરેન્દ્રભાઈની અડગ ઈચ્છાશક્તિના કારણે ભારત વિશ્વગુરૂ બનવા તરફ ઝડપભેર આગળ વધી રહયું હોવાનું આ ઉદાહરણ છે એમ પણ તેમણે ઉમેર્યું હતું.
સતત વિકાસ સાધી દુનિયાના સૌથી મોટા અર્થતંત્ર ધરાવતા દેશોમાં સ્થાન મેળવવું એ વડાપ્રધાનનું સર્વોચ્ય ધ્યેય હોવાનું મંત્રીશ્રીએ જણાવી ઉમેર્યું કે, ભારતે મેન્યુફેક્ચરિંગ, ડિઝિટલ વર્લ્ડ, ઈકોનોમિક ગ્રોથ જેવા મહત્વના માપદંડો પર ધ્યાન કેન્દ્રીત કરી વિકાસની હરણફાળ ભરી છે.
ગુજરાતના મુખ્યમંત્રી તરીકેના કાર્યકાળમાં વડાપ્રધાનશ્રીએ આધારની ક્ષમતા અને ઉપયોગિતા યથાર્થ સમજી હતી, જે તેમણે વડાપ્રધાન બન્યા બાદ અનેક યોજનાઓને આધાર સાથે જોડી લાભાર્થીઓને સીધા બેંક ખાતામાં સહાયના નાણા જમા કરવામાં અને ડિજીટલ ભારત અભિયાનને વેગવાન બનાવવામાં આધારનો સફળ પ્રયોગ કર્યો છે.
તેમણે ગુજરાતી ન હોવા છતાં ગુજરાતીઓને મોદીજી જેવા ગુજરાતી અંગે વાત કરવાનું સાહસ કરી રહ્યા હોવાની રમૂજ કરી જણાવ્યું કે, સુરતનો વિકાસ આંખે ઉડીને વળગે તેવો છે, જ્યારે વિકાસમાં ગુજરાત મોડેલની બરોબરી થઈ ન શકે.
પ્રારંભે સ્વાગત પ્રવચન કરી વિદેશ મંત્રીશ્રીને સુરતની ભૂમિ પર આવકારતા ગૃહ, રમતગમત રાજ્યમંત્રીશ્રી હર્ષ સંઘવીએ જણાવ્યું કે, ડો.એસ.જયશંકર દેશવિદેશમાં અવારનવાર સુરતના ચોમેર વિકાસ, શ્રેષ્ઠ ઈન્ફ્રાસ્ટ્રક્ચર સુવિધાઓની સરાહના કરતા રહે છે. તેમણે વડાપ્રધાન અને વિદેશમંત્રીશ્રીની સ્થાયી અને જનહિતની વિદેશનીતિથી નિતનવા પડકારોને અવસરમાં ફેરવી વિકસતા ભારતની છબીને વૈશ્વિક ધોરણે સરાહવામાં આવે છે એમ જણાવ્યું હતું.
સ્વામી વિવેકાનંદ ગુજરાત રાજ્ય યુવા બોર્ડના સ્ટેટ સંયોજક કૌશલભાઈ દવે,સુરત મહાનગરપાલિકાના સંયોજક પ્રો. વિજયકુમાર રાદડિયા અને રાહુલભાઈ તિવારીએ જિલ્લા વહીવટીતંત્રના માર્ગદર્શન હેઠળ કાર્યક્રમને સુપેરે સફળ બનાવ્યો હતો.
આ પ્રસંગે કેન્દ્રીય રેલ્વે અને ટેક્ષટાઈલ રાજ્યમંત્રી શ્રીમતી દર્શનાબેન જરદોશ, ધારાસભ્ય શ્રીમતી ઝંખના પટેલ, જિલ્લા કલેક્ટરશ્રી આયુષ ઓક, મ્યુ.કમિશનર શાલિની અગ્રવાલ, પોલીસ કમિશનરશ્રી અજય તોમર, યુનિવર્સિટીના વાઈસ ચાન્સેલરશ્રી કે.એન.ચાવડા, પ્રોફેસરો, અધિકારીઓ તેમજ મોટી સંખ્યામાં યુવા વિદ્યાર્થીઓ ઉપસ્થિત રહ્યા હતા.
૦૦-
મોદી@૨૦ પુસ્તકમાં મહાનુભાવોએ નરેન્દ્રભાઈ મોદીના સુશાસન અને કુશળ વ્યક્તિત્વની રોચક વાતો આલેખી છે
મોદી@૨૦ પુસ્તકમાં ગૃહ-સહકાર મંત્રીશ્રી અમિત શાહ, વિદેશ મંત્રીશ્રી એસ.જયશંકર, રાષ્ટ્રીય સુરક્ષા સલાહકારશ્રી અજિત ડોભાલ, અર્થશાસ્ત્રી શ્રી અરવિંદ પનગઢિયા, અભિનેતા શ્રી અનુપમ ખેર, બ્યુરોક્રેટશ્રી નૃપેન્દ્ર મિશ્રા, પર્યાવરણવિદ અને આધ્યાત્મિક ગુરુ શ્રી સદ્દગુરૂ જગ્ગી વાસુદેવ, ઉદ્યોગપતિ ઉદય કોટક, ભારતરત્ન સ્વ.ડૉ.લત્તા મંગેશકરજી, સમાજસેવિકા શ્રીમતિ સુધા મૂર્તિ અને બેડમિન્ટન સ્ટાર પી.વી. સિંધુ સહિત વિવિધ ક્ષેત્રના ૨૧ પ્રબુદ્ધો દ્વારા વડાપ્રધાન શ્રી નરેન્દ્રભાઈ મોદીની ઉન્નત ભારતના વિઝન અને કુશળ પ્રશાસનની વાતો વર્ણવી છે. પુસ્તકની પ્રસ્તાવના ભારતરત્ન સ્વર સામ્રાજ્ઞિ સ્વ.લતા મંગેશકરે લખી છે.